Mesazhi i Prof. Abas ERMENJIT me rastin e pesëvjetorit të Komitetit Kombëtar "Shqipëria e lirë"

Shqiptarë të Mërgimit !
Luftëtarë të Qëndresës Kombëtare !
Sot, më 26 të Gushtit, mbushen pesë vjet qëkur patrioti i math MIDHAT FRASHËRI themeloi, në mërgim, Komitetin "Shqipëria e Lirë". Në mëndjen e Udhëheqësit të paharruar, një komitet i tillë duhej të kish vleftat dhe e lartësinë morale që lipsen për të përfaqësuar sa më mirë popullin Shqiptar, përjashta, dhe për t'i ndihmuar në luftën e çlirimit nga komunizmi, që ai po vuan me trimëri të pashoqe. Një komitet që merr përsipër barrën e rëndë të udhëheqi Kombin në luftë kundër një regjimi tiranik të mbajtur nga një imperializëm i jashtëm, siç është komunizmi, duhet të përfaqësojë në shkallën më të lartë traditën e lirisë Kombëtare dhe qëllimin shoqëror e moral të sakrificavet që bëhen, të gjakut që derdhet, të jetëvet që shuhen. Ky ish mendimi i MIDHAT FRASHËRIT, ky është mendimi i ynë. Prandaj e kujtojmë me kaqë dhimbje e nderim Kryetarin e vdekur.

Komiteti Kombëtar-Demokrat "Shqipëria e Lirë" nuk i është larguar kësaj vije. Megjithëse i është dashur të vazhdojë punën në mes rrethanash të vështira që lejonin shumë pakë, ky komitet ka mundur të qëndrojë si një përfaqësi e vërtetë e popullit Shqiptar.

Komiteti Kombëtar Demokrat "Shqipëria e lirë " mbetet i hapur për të gjitha energjitë e reja Kombëtare që mund të duken kështu e tutje, për çdo lëvizje, parti, a grup a person, në mërgim e brenda në Atdhe, që don me gjithë zemër lirinë e Shqipërisë.

Komiteti Kombëtar Demokrat "Shqipëria e Lirë" përpiqet të bashkojë në një front të vetëm të gjitha fuqitë e vërteta Kombëtare për të përmbysur tiraninë komuniste dhe për t'i siguruar Shqipërisë vendin e sajë në familjen e kombevet të lirë.

Komiteti Kombëtar Demokrat "Shqipëria e Lirë" është për afrimin, për bashkëpunimin e drejtë midis grupevet, klasëvet, popujvet e kombevet, në kuptimin më të lartë të moralit, në frymën më të nxehtë të dashurisë njerëzore.

Komiteti Kombëtar Demokrat "Shqipëria e Lirë" kërkon shkuarje të mirë me fqinjët, edhe bashkëpunim me Botën e Lirë, sidomos me dy Demokracitë e Mëdha të Perëndimit, Shtetet e Bashkuar dhe Anglinë, për rivendosjen e paqes, për triumfin e lirisë.

Shqiptarë, kudo që jini, brenda dhe jashtë Shqipërisë !
Bashkohuni rreth Komitetit Kombëtar Demokrat "Shqipëria e Lirë" që përpiqet të realizojë aspiratat t'uaja, që përfaqëson traditën e pamvarësisë dhe tërësisë Kombëtare !

Në bashkimin t'uaj qëndron shpëtimi i Shqipërisë !

Gazeta FLAMURI, tetor 1954

© Abas Ermenji